ព្រះអាទិត្យ​ និងកូន​ព្រិល​តូច - ភាគទី៣

Snow Flower. Picture by: WallpaperFolder

កូនព្រិលតូច​សំលឹងមើលទៅកាន់ព្រះអាទិត្យ តែមិននិយាយអ្វីសោះ។ ទឹកមុនដ៏សែនស្រងូត​ស្រងាត់​ របស់កូនព្រិលតូច ធ្វើឱ្យព្រះអាទិត្យមិនសប្បាយចិត្តយ៉ាងខ្លាំង។ លុះមួយសន្ទុះ​ក្រោយ​មក កូនព្រិលតូច​ ចាប់ផ្ដើម​និយាយ​ទៅកាន់​ព្រះអាទិត្យ​ ថា "ខ្ញុំ​នឹក​អ្នក​ជាងអ្វី​ទាំងអស់ តើអ្នក​នឹកខ្ញុំ​ទេ? តើ​អ្នក​មាននឹកខ្ញុំទេ? ខ្ញុំមិនដែល​នឹកអ្វី​ដូចនេះទេ! ខ្ញុំ​មានអារម្មណ៍ថា​ឯកោ​ណាស់! អ្នកគួរតែ​ និយាយ​មកកាន់ខ្ញុំខ្លះ គួរតែ​មកនៅជិត​ខ្ញុំខ្លះ តែប្រហែល​ជាមិនអាចទេ ព្រោះអ្នកមិនអាចធ្វើដូចនេះ​បាន!"

ព្រះអាទិត្យពិបាកចិត្តណាស់ ហើយកូនព្រិលក៏ពិបាកចិត្តដូចគ្នា ព្រោះក្ដីស្រលាញ់ដែល​គ្មាន​សង្ឃឹម​របស់​ខ្លួន។​​ ពីមួយថ្ងៃ ទៅដល់មួយថ្ងៃ ពេលវេលាយូរដូចជាមួយឆ្នាំ​សម្រាប់​អ្នកទាំងពីរ។

កូនព្រិលតូច ចាប់ផ្ដើមមានអ្នកស្រលាញ់​​ជាបន្ដបន្ទាប់ តែកូនព្រិលតូច​បានបដិសេធជានិច្ច។ កាលដែលបដិសេធនេះ​ ធ្វើឱ្យអ្នកគ្រប់គ្នាឆ្ងល់យ៉ាងខ្លះ ថាហេតុដូចម្ដេច​ កូនព្រិលតូចមិនយល់ព្រម​ទទួលសេចក្ដី​ស្នេហា​ពីអ្នក​ណាសោះ?​

កូនព្រិលតូចតែង​គិតក្នុងចិត្តថា បើសិន​ជាអាចមែននោះ នឹងសុំខ្លួនធ្វើជាពពក ដែល​អាច​ហោះកាត់ព្រះអាទិត្យទៅមកខ្លះ ហើយជិតជាងព្រះអាទិត្យជាងកាលដែលខ្លួន​នៅលើដីបែប​នេះ។

អ្នកតាមស្រលាញ់កូន​ព្រិល​តូច​ម្នាក់ ដែល​តាម​ពិតជា​ចៅ​ប្រុស​របស់​លោក​ព្រិទ្ធា​ចារ្យ​ព្រិល បាន​តាម​មើល​ថែ​រក្សា​ កូន​ព្រិល​តូច តាំង​ពីដើម​មក ដែលកូន​ព្រិល​តូច ទុក​ដូច​ជា​បង​ប្រុស​ម្នាក់​ទៅ​ហើយ។ ឃើញ​កូន​ព្រិល​តូច​ចេះតែ​មិនសប្បាយចិត្ត​ ដូច្នេះ គាត់​ក៏យ​ក​ផ្កា​ព្រិល​ ដែល​មានរស​ជាតិ​ឆ្ងាញ់​ឱ្យ​ទៅកូនព្រិល ហើយ​ប្រាប់ថា បើ​យើងឃ្លាន យើងអាចញាំអ្វីក៏បាន បើយើងពិបាកចិត្តយើង​គួរញាំអ្វី ដែលយើងចូលចិត្ត។ មូលហេតុ​ព្រោះ....។ អ្នកតាមស្រលាញ់នោះ មិននិយាយ​ទៅ​មុខទៀត​សោះ ហើយទុកឱ្យ​កូន​ព្រិល​តូចឆ្ងល់​យ៉ាងខ្លាំង។

បន្ទាប់​ពីនោះ​មក អ្នកតាម​ស្រលាញ់​កូន​ព្រិលតូច​នោះ​​ ក៏បានចេញទៅពិភពលោក​ខាង​ក្រៅ ហើយបាត់ដំណឹងសូន្យឆឹង។ រីឯកូនព្រិលតូច​ក៏​កាន់តែ​ឯកោ​ ថែមមួយកុំរិតទៀត។
អារម្មណ៍ដែល​ចូល​ចិត្តនិយាយ​ទៅកាន់ព្រះអាទិត្យ​នោះ ក៏​បាត់ទៅតាមនោះដែរ។ ព្រះអាទិត្យ​បញ្ចេញ​កំដៅ​ពីមួយថ្ងៃ ទៅមួយថ្ងៃ ក្ដៅឡើងៗ បង្ហាញពីអារម្មណ៍ខ្លួន ដែល​ឯកោ​ដូច​កូនព្រិលតូច។

កូនព្រិលតូច​ សម្រេចចិត្តធ្វើដំណើរផ្សងព្រេងទៅរក​បងប្រុសរបស់ខ្លួន ហើយសន្យា​ថាឈប់គិត​អំពីព្រះអាទិត្យ​ទៀត។