ស្រមោល៖ លើកថ្ងៃប្រលង
នេះជាថ្ងៃប្រលងបញ្ចប់ថ្នាក់ទី១១ ត្រៀមចូលថ្នាក់ទី១២ របស់វិទ្យាល័យម៉ូរ៉ា។ សិស្សទាំងឡាយប្រញាប់ប្រញាល់រត់ចូលសាលារៀន ព្រោះជិតដល់ម៉ោងប្រឡងហើយ។ សាលារៀននេះ មានទីធ្លាធំ និងដើមឈើធំៗ ផ្តល់ម្លប់ត្រជាក់ ហើយមានអាគារសិក្សា៣ខ្នង យ៉ាងស្អាត។
បើក្រឡេកមើលទៅក្នុងថ្នាក់ នៅជាន់ទី២ នៃអាគារកណ្តាលមួយនោះវិញ យើងឃើញមានសិស្សទាំងអស់ ស្លៀកពាក់ឯកសណ្ឋានយ៉ាងត្រឹមត្រូវ អង្គុយតាមជួរ តាមលេខរៀងយ៉ាងមានសណ្តាប់ធ្នាប់ ដើម្បីត្រៀមប្រលងរួចជាស្រេច។
បន្ទាប់ពីចាប់ផ្តើមប្រលងបាន ១៥ នាទី...
"ឯងមិនមើលមេរៀនមុនពេលប្រលង អីសោះតែម្តងឬ?" លោកគ្រូ រហ័សនាម "កំពូលតឹងប្រចាំសាលា" ឈ្មោះពិតហៅ "ដូ" បានចាប់ប្រ៊ីយ៉ុងរបស់សិស្សប្រុសម្នាក់
"សុំទោសលោកគ្រូ" សិស្សនោះឆ្លើយដោយបែកញើសសស្រាក់ ព្រោះភ័យខ្លាំង
"មិនបាច់សុំទោសទេ ចេញទៅ" លោកគ្រូ ដូ ធ្វើមុខធម្មតា រួចបានយកប៊ិចក្រហម គូសលើក្រដាសប្រលងរបស់សិស្សនោះ ដាក់ថា "F"
"បាទ" សិស្សប្រុសនោះដើរចេញទាំងមុខស្រងូតស្រងាត់ ព្រោះដឹងថាខ្លួននឹងត្រូវធ្លាក់ហើយ
សកម្មភាពចាប់ប្រ៊ីយ៉ុងនេះ បានឆក់យកការយកចិត្តទុកដាក់ក្នុងការប្រលង របស់សិស្សជាច្រើនបានបន្តិច។ ក្នុងនោះ ក៏មានអ្នកខ្លះដែលរៀបនឹងដកប្រ៊ីយ៉ុងមើល ដូរការគិត ហើយលាក់ប្រ៊ីយ៉ុង ឬគប់ប្រ៊ីយ៉ុងខ្លួនចោលអស់ទៅ។
តែសិស្សស្រីម្នាក់ ឈ្មោះ លីម ដែលអង្គុយតុក្បែរបង្អួច នៅជួរមុខគេ នោះ ដូចជាមិនភ្ញាក់ផ្អើលអ្វីសោះ។ វាមិនប្លែកទេ ព្រោះនាងជាងជាសិស្សពូកែក្នុងថ្នាក់ស្រាប់ហើយ នាងមិនដែលខ្វល់ និងចាប់អារម្មណ៍លើរឿងមិនបានការដូចនេះទេ។ បូកផ្សំនឹងគ្មានមិត្តភក្តិជិតស្និទ្ធិផង នាងត្រូវតែជាមនុស្សនឹងនរ ឯករាជ្យដូច្នេះហើយ។ នាងគិតតែអោនសរសេរៗ។
នៅពេលកំពុងតែយកចិត្តទុកដាក់ លើក្រដាសរបស់នាង វាហាក់ដូចជាមានចំណាំងផ្លាតពន្លឺមកលើក្រដាស។ នាងព្រិចភ្នែកទប់នឹងពន្លឺនោះ។ នៅពេលបើកភ្នែកមកវិញ នាងមើលក្រដាសប្រលងមិនច្បាស់សោះ ព្រោះមានស្រមោលបាំងពន្លឺមកលើក្រដាសប្រលងនោះ។ នាងងើយមើល ហើយធ្វើឱ្យនាងឈប់សរសេរអ្វីទាំងអស់។ នាងអង្គុយធ្មឹង ដូចជាមនុស្សខ្មោចចូលអ៊ីចឹង។ បន្តិចក្រោយមក នាងស្រាប់តែយកដៃស្តាំ ចាប់ប៊ិចខៀវ ដែលនៅលើតុ យ៉ាងណែត ហើយចាក់ពោះខ្លួនឯងម្តងហើយ ម្តងទៀត។
ឈាមលីមបានខ្ទៀតមកលើក្រដាស់ប្រលងរបស់សិស្សស្រីម្នាក់ទៀតដែលនៅក្បែរនោះ។ សិស្សស្រីនេះ ឈ្មោះ លីកា។ នាងជាមនុស្សដំបូងដែលបានងាកមើលទៅលីម ហើយ ស្អែកយ៉ាងខ្លាំង ហើយធ្វើឱ្យអ្នកគ្រប់គ្នា ព្រមទាំងលោកគ្រូ ដូ ភ្ញាក់ផ្អើលយ៉ាងខ្លាំង។ លីកា រន្ធត់យ៉ាងខ្លាំង នាងស្រែកហើយក៏បាត់មាត់រហូត។ ឯលីម ត្រូវបញ្ជូនទៅមន្ទីរពេទ្យ តែជាអកុសល នាងបានបាត់បង់ជីវិតទៅហើយ។
បន្ទាប់ពីហេតុការណ៍នេះ វិទ្យាល័យម៉ូរ៉ា ប្រកាសផ្អាកការប្រលងថ្នាក់ទី ១១ និងលើកការប្រលងនេះទៅខែក្រោយ។
Comments
Post a Comment