ឆ្កួតបីប្រការ

ប្រាជ្ញចាស់ ប្រាជ្ញថ្មី	បុរាណពោលស្ដី	ឆ្កួតបីប្រការ
សូមអ្នកចងចាំ	ទន្ទេញសិក្សា	កុំភ្លេចតម្រាស់
	បុរាណចងក្រង។
ទំមួយនោះឯង	ឆ្កួតទៅនឹងល្បែង	ឆ្កួតល្បែងស៊ីសង
លេងយប់លេងថ្ងៃ	បៀចិន បៀតង	បបួលអ្នកផង
	លេងឥតទំនេរ។
លេងភ្លេចស៊ីបាយ	អ្នកស្រុកនាយអាយ	ហៅស៊ីឆ្លើយទេ
ស្រែកថាមិនឃ្លាន	ឆ្អែតហើយណាចែ៎!	នេះក៏ព្រោះតែ
	ឆ្កួតល្បែងពាលា។
មួយយប់ទល់ភ្លឺ	ភ្លេចអស់ស្រែភ្លឺ	ទាំងដីចម្ការ
រវល់ពេនភ្នេន	គ្មានពេលឯណា	ទៅមើលត្រួតត្រា
	របស់របរ។
ភ្លេចក្របីគោ	ស្មៅក៏មិនរក៍	គោស្រែកម៉ៗ
ឈរត្រាច់ដេរដាស់	ព្រោះម្ចាស់កម្រ	រវល់តែ ត
	មួយដៃទៀតសិន។
ទីពីរនោះណា	ឆ្កួតនឹងសុរា	ព្រឹកដល់ផ្ទះចិន
បើកភ្នែកមិនទាន់	ហ៊ា!​មាត់ធុំក្លិន	ឲ្យតែបែបហ្នឹង
	ស្លាប់មិនយូរទេ។
ប្រការទីបី	ឆ្កួតល្បែងនឹងស្រី	អប្រិយគ្នាន់គ្នេរ
ប្រពន្ធកូនឯង	មិនថែថួនទេ	រីប្រពន្ធគេ
	ចោមរោមសម្លឹង។
បុរាណពោលថា	ឆ្កួតបីប្រការ	ប្រុសស្រីត្រូវដឹង
ទីមួយឆ្កួតល្បែង	ពីរគ្រឿងស្រវឹង	អ្នកត្រូវថ្លែងថ្លឹង
	ទីបីឆ្កូតស្រី។