សេចក្តីសង្ខេប - រឿងផ្កាស្រពោន
ផ្កាស្រពោន ជារឿងស្នេហាដ៏គួរខ្លោចផ្សារមួយ ដែលខ្ញុំស្រឡាញ់គ្នាយ៉ាងផ្តាច់ប្តូរ តែត្រូវព្រាត់គ្នា ដោយការប្រឆាំងពីមេបា។ សេចក្តីស្នេហា មួយគូរវាងប៊ុនធឿន និងវិធាវីនេះ មិនមែនកើតឡើងដោយចៃដន្យឬ ដោយចិត្តរត់រកគ្នានោះទេ គឺកើតឡើយដោយមាតាបិតានៃសាម៉ីខ្លួនទាំងពីរ បានបណ្តុះស្នេហានេះ ឱ្យមានរូបរាងឡើង តាំងពីកុមារភាពមកម្លេះ រហូតបន្សល់ទុកនូវស្នាមស្នេហ៍រវាងអ្នកទាំងពីរ ដល់ធំពេញវ័យ។
វិធាវី ជាកូនក្រមុំបណ្តូលចិត្តរបស់យាយនួន មានទីលំនៅ នៅភូមិវត្តពោធិក្នុង ក្នុងបាត់ដំបង។ ឪពុករបស់នាងដែលធ្លាប់តែពេញចិត្តនឹងលើកនាងឱ្យទៅ ប៊ុន ធឿន នោះបានទទួលអនច្ចកម្មទៅហើយ។
សព្វថ្ងៃនេះ ធាវីរស់នៅជាមួយនឹង មាតារបស់នាង ដែលមានវ័យចាស់បន្តិចទៅហើយនោះ និងមានបាវបំរើម្នាក់មានអាយុច្រើនជាង គាត់ទៅទៀត ឈ្មោះយាយផៃ។ យាយផៃ ស្រលាញ់ពេញចិត្តនឹងនាងវិធាវីណាស់ដែរ គាតសប្បាយ ឬគាត់ព្រួយតាមការប្រែប្រួលនៃទឹកមុខនាង វិធាវី ហើយតែងចាត់ទុកនាងដូចជាកូនបង្កើត។
ប៊ុន ធឿន សង្សារវិសេសរបស់នាងវិធាវី ក៏មានទីលំនៅក្នុងខេត្តបាត់ដំបងដែរ ប៉ុន្តែនៅឆ្ងាយអំពីទីក្រុង គឺនៅដល់ទៅភូមិព្រះឯណោះ។ ឪពុកម្តាយសព្វថ្ងៃ នៅរស់ទាំងអស់។ ចឹក ប៊ុន ថន រកស៊ីធ្វើជំនួញ ស្រូវ ចេះតែខាតរៀងរាល់ឆ្នាំ រហូតដល់ធ្លាក់ខ្លួនក្រ។ ហើយភរិយារបស់គាត់ព្រមទាំងនាង សោភ័ណ ជាបុត្របានខំធ្វើការរកស៊ីសន្សំប្រាក់ ដើម្បីទុកសងបំណុល។ ក្នុងពេលវិស្សមកាល ត្រឡប់ទៅភូមិកំណើតវិញ ក៏បាននិយាយអង្វរឪពុកថា ខ្លួនឈប់ទៅរៀនទៀត ដើម្បីជួយធ្វើការឪពុកម្តាយវិញ។ ប៊ុនថន ជាឪពុកដ៏ប្រសើរ មិនព្រមឱ្យកូនឈប់រៀនឡើយ។ គាត់និយាយពន្យល់កូន ពីទឹកចិត្តដែលឪពុកខំដើម្បីអោយកូនរៀន រហូតដល់ប៊ុន ធឿនសុខចិត្តទៅរៀនតាមបង្គាប់របស់គាត់។
ចាប់តាំងពីបានដំណឹងច្បាស់ថា គ្រួសាររបស់ចឹក ប៊ុនថន ធ្លាក់ខ្លួនក្រ លោកយាយនួន ខំពន្យល់ណែនាំនាងវិធាវី អោយបោះបង់សេចក្តីស្នេហាជាមួយប៊ុន ធឿននោះចោល។ នាងវិធាវី អន់ចិត្តនឹងម្តាយណាស់ តែនាងមិនហ៊ានតពាក្យសំដី ព្រោះអាចនាំអោយញាតិផង ថានាងជាកូនអកតញ្ញូចំពោះម្តាយ។ នាងចេះតែនឹកទៅដល់ប៊ុន ធឿន ទាំងយប់ទាំងថ្ងៃ។ ថ្ងៃមួយប៊ុនធឿនបានទៅលេងទីក្រុងបាត់ដំបង បានឆ្លៀតឱកាសទៅជួបនាងវិធាវីបានមួយភ្លែត។នាងធាវីប្រាប់នូវរឿងរ៉ាវសព្វគ្រប់ ហើយផ្តែផ្តាំ ប៊ុន ធឿនអោយខំយកចិត្តទុកដាក់ក្នុងការសិក្សា ថែមទាំងឱ្យរូបថត មួយសន្លឹកមក ប៊ុន ធឿន ដើម្បីទុកជាអនុស្សាវរីយ៍។
ឥឡូវនេះ បវេសនកាលថ្មីបានមកដល់ទៀតហើយ។ ប៊ុន ធឿន ក៏បានចូលទៅក្នុងអនុវទ្យាល័យស៊ីសុវត្ថិទៀត។ ពេលដែលប៊ុន ធឿនខំសិក្សាតាមពាក្យសន្យា។
លោកយាយនួន បានបង្ខំចិត្តវិធាវី ឱ្យរៀបការនឹងអ្នកកម្លោះ ណៃស៊ត ជាកូនប្រុសរបស់លោក ណៃ ស៊ាន ជាអ្នកមានស្តុកស្តម្ភក្នុងខែត្របាត់ដំបង។ វិធាវី ស្អប់ខ្ពើម ណៃស៊ត ជាទីបំផុត ហើយនាងខឹងនឹងម្តាយនាង ក៏មិនតិចដែរ ប៉ុន្តែនាងមិនហ៊ាននឹងរឹងរូសនឹងម្តាយនាងទេ។ នាងសរសេរសំបុត្រប្រាប់រឿងរ៉ាងទាំងនេះ ដល់ប៊ុន ធឿន ព្រមទាំងប្រកាសថា នាងមិនព្រមរៀបការជាមួយនឹងបុរសដទៃក្រៅពី ប៊ុន ធឿនឡើយ។ កំលោះ ប៊ុន ធឿន ផ្ញើរសំបុត្រមកប្រាប់វិធាវីឱ្យសុខចិត្តរៀបការជាមួយកំលោះ ណៃស៊តទៅ ព្រោះគេជាអ្នកមាន គេអាចរកសុភមង្គលមកឱ្យគ្រួសារបានដោយងាយ។
ទោះបីប៊ុនធឿន អង្វរយ៉ាងនេះក៏ដោយ ក៏នាងវិធាវីមិនព្រមតាមបំណងម្តាយនាងទេ ព្រោះនាងស្រឡាញ់ប៊ុន ធឿនខ្លាំងណាស់ ហើយដឹងថាប៊ុន ធឿនក៏ស្រលាញ់នាងណាស់ដែរ។ មួយវិញទៀតនាងដឹងថា អ្នកកំលោះណៃស៊ត ជាព្រាននារី តែរំលោភបំពានលើគេ។ មួយថ្ងៃៗ នាងវិធាវីយំសោក ឥតដែលខាន។ រាងកាយនាងកាន់តែស្គមបន្តិចម្តងៗ។
យាយនួនឃើញដូច្នេះ ក៏នាំនាងទៅលេងអង្គរ នៅខេត្តសៀមរាប ទៅសំណាក់នៅផ្ទះមិត្តភក្តិជិតស្និទ្ធិនឹងខ្មោចប្តីគាត់ ឈ្មោះលោកបេង ជុន និងនាងស៊ីម៉ារ៉ា។ ទៅឃើញអង្គរបែជាឃើញដូច ឃើញខ្ទមចាស់កម្សត់មួយទៅវិញ។ លុះនាងឃើញ ព្រះពុទ្ធរូបមួយអង្គធំ នាងបួងសួងសុំឱ្យព្រះជួយនាងឱ្យ រួចពីក្រញាំរបស់ ណៃស៊ត។ បន់ព្រះមិនទាន់ផុតពីមាត់ផង ស្រាប់តែណៃស៊ត ដើរទៅឈរក្បែរនាងភ្លាម។ នាងខឹងខ្លាំង ទៅជាឈឺ ដោយស្របពេលនៅខេត្តសៀមរាបតែម្នាក់ឯង គ្មាននរណាម្នាក់យល់ពីដួងចិត្តនាង។ យាយនួន ឃើញកូនឈឺធ្ងន់ក៏នាំនាងវិលត្រឡប់មកស្រុកកំណើតវិញ។ តែទោះបីនៅ ឬចាកចេញ វិធាវីនៅតែមិនរសាយចិត្តសោះ។
ថ្ងៃរៀបការកាន់តែជិតចូលមកដល់ ហើយជំងឺរបស់នាងវិធាវី កាន់តែធ្ងន់ធ្ងរឡើងៗ ពីមួយថ្ងៃទៅមួយថ្ងៃជាលំដាប់។ យាយនួន ហើយនឹងនាងថូជាម្តាយរបស់ណៃស៊ត បានទៅអញ្ជើញហោរា អារក្សអ្នកតា និងគ្រូអាចារ្យ មកស្រោចទឹកឥតដែលខាន តែជម្ងឺគ្រុននៅដដែល។
និយាយពី ប៊ុនធឿនវិញ។ អ្នកកម្លោះនេះ នឹកដល់វិធាវីគ្រប់ពេលវេលាដែរ ប៉ុន្តែអ្នកស៊ូឱបសេចក្តីទុក្ខ ដើម្បីឱ្យស្រីបានសុខ និងថ្កុំថ្កើនមុខមាត់។ ក្នុងឱកាសបុណ្យចូលឆ្នាំ អ្នកវិលទៅសម្រាកនៅភូមិកំណើត ទៅលេងព្រៃជាមួយនឹងតាសូ ហើយនឹងអ្នកស្រុក ប្រុសស្រីជាច្រើនទៀត ដើម្បីបំបាត់ទុក្ខ។
អ្នកស្រុកអ្នកភូមិកំពង់ព្រះ ចូលព្រៃរនាម ដើម្បីរកទឹកឃ្មុំ ចំណែកប៊ុនធឿន ចូលព្រៃរនាម ដើម្បីកំចាត់ជម្ងឺ ដែលកើតឡើងពីរឿងជិវិតស្នេហ៍។ ពេលយប់ក្នុងព្រៃស្រាប់ជួបពួកចោរ តែពួកគេបានរួចខ្លួនព្រោះពួកគេដឹងមុន ទើបប្រយុទ្ធជាមួយចោរបានជោគជ័យ។
ក្រោយពេលវិលពីព្រៃរនាមវិញ ប៊ុនធឿន សុំលាឪពុកម្តាយទៅលេងក្រុងបាត់ដំបង ក៏ដើរបង្ហួសទៅដល់វត្តពោធិក្នុង ស្រាប់តែឃើញមនុស្សអ៊ូរអរពាសពេញទាំងក្មេងទាំងចាស់។ ពេលចូលទៅដល់ស្រាប់តែ ឃើញរូបថតនាងវិធាវី ស្របនឹងមានក្តារមឈូស ទើបដឹងថាវិធាវីបាត់ងជីវិតបាត់ទៅហើយ ព្រោះវិបត្តិស្នេហ៍។ មុននឹងនាងស្លាប់ នាងបានបន្សល់ទុកនូវចិញ្ចៀនមួយវង់ និងសំបុត្រមួយឱ្យប៊ុនធឿន ជាគូម្ចាស់បណ្តូលចិត្ត៕
Comments
Post a Comment