បងចាំញញឹមជាថ្មី - លោក ស៊ីន ស៊ីសាមុត

I) ភ័ក្ត្រាពព្រឹមញញឹមសែនស្រស់ 

ចោលក្តីស្រណោះមិនអស់អាល័យ 

បងខំស្រឡាញ់ ស្រឡាញ់ស្ទើក្ស័យ 

រាល់ពេលស្រម៉ៃថាថ្លៃជាគូ។

II) ថ្ងៃនេះផ្ទៃមេឃអ័ព្វអន់រស្មី 

តើរឿងហេតុអ្វីមេឃមិនអាសូ 

មេឃផ្លាស់ភ្លាមៗប្រៀបបានជំនោរ 

ទ្រូងអើយពេញពោរដោយក្តីខ្លោចផ្សារ។

R) ស្រណោះទាំងអស់គ្រប់គ្រាកំសត់ 

មានតែមួយគត់នៅក្នុងលោកា 

តែស្នេហ៍ដូចព្យុះកណ្តាលជលសារ កើតទុក្ខយ៉ាងណា 

ឱ!អនិច្ចាវាសនាអភ័ព្វជាប់កម្មភិសម័យ។

III) ថ្ងៃក្រោយតើបាននរណាញញឹម 

ភ័ក្ត្រាពព្រឹមខានឃើញហើយថ្លៃ 

បងគេងទ្រាំចាំចាំសាជាថ្មី

ក្រែងបានឃើញស្រីញញឹមម្តងទៀត៕